羊年行大運，費清年初四走咗去八仙嶺行山，行到上氣唔接下氣之際，竟然野生捕獲咗發哥！費清當日晨早九點喺鹿頸起步，經過黃嶺預備轉上八仙嶺段時，成個山頭靜英英，只有無盡石級，突然間有一班人聲，越走越近。
#自動波玩Usie
呢班山友行得咁鬼快，費清轉身想打個招呼，對方已搶閘叫聲恭喜發財。位山友黑黑實實，身形好弗，睇真啲，原來係發哥！發哥二話不說，問費清攞部手機，自動波同我哋玩群拍（Usie），仲做埋導演教點樣排位，又話等嚿雲吹開有太陽先影，有要求，好專業。
其實費清舊年底喺荃灣大帽山行山都撞過發哥，今次同發哥提起，佢話記得，表示當日行得急無同費清Usie，今次補數。同發哥影完相，就見到一班參加咗大露營嘅中學生，佢哋話蕩失路，揹住十幾公斤背囊喊晒口。發哥去親自教班細路點行，有學生妹好開心咁喘住氣話：「好彩行錯路。」
費清 ＃要生計，也要生活 ＃毋忘初衷