人稱祖堯BB嘅中大校長沈祖堯一向「朵」多，噚日又多一個─中大爛Gag王。佢噚日喺新春傳媒茶敍，宣佈新成立「女性及家庭友善政策專責小組」，除咗大肆慶祝三八婦女節，為咗方便媽媽，決定喺崇基、聯合同善衡書院設立哺乳室。
明明大家聽得明，祖堯BB硬要加句解釋：「即唔係捉魚（捕魚）意思，即係如果要餵人奶，佢可以喺嗰度做餵人奶嗰啲嘢。」台下爆笑，佢自己都為爛Gag笑埋一份。
祖堯BB之後又帶領幾位高層搞碟賀年菜「風生水起」，將食材切絲再撈埋一齊。幾位高層雞手鴨腳，成班地獄廚神，祖堯BB則在旁搞笑抱住中大自家栽種嘅一個大蘿蔔，話成個BB咁、當正BB咁抱，仲話碟嘢加咗膠料──有高層切埋一啲膠手套絲落去喎。佢之後為記者寫揮春，下款竟然係「祖堯BB」囉！