阿仙奴（圖）今晚贏波嘅穩陣程度，大膽講句，同《飛鳥俠》之前大熱掄元奧斯卡「最佳電影」無異。
摩佬近期忙於對付球證，亦不忘寸近年冇乜好成績嘅雲格，喺阿仙奴打緊一份世人夢寐以求嘅好工；寸王開動口水機器，事必有因，應該感受到季尾阿仙奴有啲料到，打定心理戰。
事實上，阿仙奴踏入新一年，行緊運，除咗倫敦打吡，輸畀喺嗰場勁到無倫嘅熱刺外，暫時順風順水；去到三月尾前嘅賽程，最難啃暫時只係足總盃作客曼聯。啱啱上周末，兵工廠作客水晶宮幾乎臨尾香，要鬧都係雲佬怕死，末段又出夠六個後衞，打大巴陣，力保勝局。佢老人家好彩，對手最後攻門中柱不入，加埋熱刺同修咸頓失分，兵工廠險勝，升番第三位，對今晚亮相歐聯嘅信心，幫助唔少。
未計今朝兩場波，近三季歐聯十六強淘汰賽，以次名身分晉級嘅主隊，未知怯於強手或者力有不逮，首回合多數冇運行，總計二十場波，只錄得三勝；不過今晚阿仙奴對手只係熟路、殘陣，識守唔識攻嘅摩納哥，唔係一般嘅次名迎首名之戰。份履歷表冇歐聯冠軍嘅雲格扮謙，賽前話五五波，但呢場若早段領先，咪再派兩個「阿基」基比爾包列斯達同基蘭基比斯，喺防線自己塞死自己；肯換入禾仔同韋舒亞，繼續支援前線火力，呢場半/一超低水盤，應該大膽啲改博[-1]望大炒，次回合作客會好打好多。
睇番兵工廠近四年亮相歐聯淘汰賽即死，對手係巴塞、AC米蘭同拜仁；相反鬥同鄉法國兵，雲格必有辦法，過去三屆，阿仙奴分組賽都遇過法國隊，錄得五勝一和。摩納哥嘅俄羅斯老闆財困，變咗青春班再靠前線貝碧托夫及後防卡維奴兩老支撐；但喺歐聯分組賽領軍六戰只失一球嘅卡維奴傷咗，摩軍呢鋪唔易頂。
《飛鳥俠》老男主角米高基頓，八十年代末期演「蝙蝠俠」聲名大噪，雲格當時剛喺摩納哥教出成績；際遇難料，走過四分一世紀後，各走極端，雲格仍擁一份萬人難求嘅絕世好工，今屆其實係大好機會，好趁退休前，帶領阿仙奴飛得更高更遠，功德無量！
文：波神
識睇，一定係睇足英台【英波Live】：
http://soccer.appledaily.com
http://bit.ly/engballlive