李嘉欣昨日到銅鑼灣時代廣場出席金龍醒獅賀新歲活動，着紅裙喜氣洋洋為舞獅點睛接財神，原來今日是她的老公許晉亨五十三歲牛一，嘉欣說：「老公今年新曆生日撞正初七，慶祝都係一家人節目。」問她準備送甚麼禮物？她說：「心意，囝囝就會畫生日卡，我幫佢畫少少。」會否追多個子女？嘉欣笑說：「睇天意，沾咗呢度旺氣，睇睇上天啦！」今個農曆年，嘉欣與亨亨及家人留港度歲，她笑言節目豐富：「年三十晚開始派利是，初一壓歲錢，作業係同家人出力包利是，整餃子、春卷，我哋仲包咗二百隻餃子，囝囝喺度搗亂玩麵粉。」
揀學校有壓力
嘉欣透露兒子Jayden有份包利是，她笑說：「面額分開，細嘅畀囝囝封，佢有時忙中有錯，不過阿仔𢭃利是就OK，學校教佢收到交畀媽咪，我就教佢講恭喜發財，雙手接利是，唔問人攞，之後再雙手交畀媽咪唔使畀爹哋，媽咪會幫佢儲起。」問到她大年初三為甚麼不陪亨亨入馬場？嘉欣說：「我都唔多去馬場，舊年都冇去，入馬場揀特別心情，唔係拉頭馬先去，每次去都好有壓力，因為次次去啲人都話會落飛，數字令我有無形壓力。」嘉欣笑言除入馬場有壓力，連為囝囝搵學校也有壓力，她表示：「人哋揀我哋，𠵱家嘅家長冇得揀，囝囝讀緊K1，時間過得好快。」
採訪：溫敏芝
攝影：葉君海
