雖然今個年度嘅立法會會期仲未完，但唔少議員已經好關注，下個年度、即係今屆立法會最後一個年度嘅財委會主席，係唔係由自由黨張宇人繼續冧莊？皆因張宇人喺處理財委會有關創科局嘅撥款時，政府、建制以至泛民都覺得佢恰如其分，如果最後一年財委會由佢掌舵，相信三方都會放心好多。
當事人張宇人，又有乜嘢意願呢？花生友噚日問過佢，佢話「世事無絕對」，但如果開個盤賭佢做唔做？買做嘅賠率，會好高喎，似乎係暗示，冧莊機會唔大。點解有口皆碑都唔再坐一會？花生友聽聞有自由黨中人認為，下年係選舉年，如果因為財委會主席個位有乜依郁，影響個黨嘅選情都唔多好。
張宇人則話，新年前成日坐定定主持會議，坐到屁股都好攰，難怪唔想再坐一會。佢仲大呻立法會主席、內務主席人工都高啲，而且有專屬辦公室，後者有時開會五分鐘就完，行行企企啫，反而財委會主席人工冇多到，會議就不斷加，認真唔公平。原來佢上任時已經想提出呢個不平等狀況，但費事俾人話係為自己而冇出聲，既然未必做多年，近來就拜託黨友方剛喺行管會反映，引述行管會主席曾鈺成已記錄在案。咁呢個位仲有邊個可以接棒？據知有人建議過「衝擊波」、即係保險界陳健波，以便「衝擊」泛民，張宇人聽完只係話對方都好勤力。
花生友