初七人日，先祝各位生日快樂，新春大吉！今年羊年屬本命年，個個急急攝太歲。我都信「本命年」，卻非因信「乜星物星」入宮，而是人生確是每十二年便進入新階段。本命年代表變動，看來是人生智慧，而非迷信之說。球員也一樣，看看以下幾隻「羊」今年的「運程」。
賀蘭特（二○○三年生）：十二歲，告別小學，邁向青春期，當然有大轉變；而對現效查爾頓流浪U13隊的賀蘭特來說，轉變可能更大；他暫列英格蘭地區少年聯賽神射手，可能已有球會吼實，做唔做球員？揀邊間球會？「羊仔」此時已要抉擇。
奧斯卡杜斯山度士（圖）（一九九一年生）：二十四歲，剛離校園踏入社會，是人生一大轉捩點；球員此時已屬當打之齡，告別U23，爭入大國腳甚至過檔大會。車仔的奧斯卡今年目標直指首個英超冠軍。有傳祖記想用保羅普巴作籌碼收購；如挖角的是皇馬，奧斯卡又會點揀？
派路(一九七九年生)：三十六歲，要諗轉工升職；球員則已達退休之齡。派路雖已續約到下季；但都已經要諗定轉做教練。
高路普（一九六七年生）：四十八歲，踏入中年，遇着事業危機就大鑊；今年多蒙特竟由爭標分子跌入護級漩渦，咪話唔腳震。
柏天尼（一九五五年生）：踏入人生第六個本命年，屬退休之齡；有人安享晚年、有人仍要捱騾仔、亦有人此時已位高權重，如將連任歐洲足協主席的柏天尼。當然，這時命運如何，還是取決於之前幾個十二年付出了甚麼。
方栢翹
now足球評述員