浸大噚日春茗，任期得番四個月嘅校長陳新滋，可能係最後一次同傳媒喺浸大茶敍。佢今年送對聯畀傳媒做新年禮物：「笑看風雲知變幻 敢師砥柱立中流」。上聯指記者心胸有團火，佢寄語記者要有智慧，睇透香港風雲變色，並要用呢種智慧幫人。下聯則指香港社會複雜，寄語保持超然、正直態度，面對衝擊都要憑良心報道，又引美國前總統甘迺迪名言，寧要傳媒不要政府，但唔好濫用第四權。
原來陳新滋趁今個新年一家三口去珠海玩，三人行訂咗兩間房，點知酒店房好爆，安排咗「休閒房」畀佢哋，原來休閒房即係麻雀房，成張麻雀枱擺咗喺中間，搞到轉個身都難。至於七月一日落莊後，佢話要休息番一頭兩個月，又笑稱自己係中國科學院院士，應該好受歡迎，加上唔使為錢煩，可以做吓化學研究工作。
陳新滋噚日仲打咗黃呔，佢話明要打破顏色偏見，黃呔唔一定係黃絲。