Icy黃婉曼係好多港女嘅羨慕對象，生得靚唔在講，事業發展又順利，成日喺各大媒體出現，接job接到手軟，最重要係嫁咗個靚仔馬主老公馮柏基，幸福重於一切。
不過Icy都唔係事事順利，上季基基隻愛駒「薑餅人」曾經打疊兩捷，當時未係馮太嘅Icy，接連拉頭馬不知幾happy。但兩個結咗婚後，隻馬暫時仍無復上季之勇。上仗更累Icy輸錢，話說當晚「薑餅人」只跑第六，賽後Icy攞疊馬票出嚟哭馬喪，表示賽前明知隻馬排12檔機會好微，但偏偏臨場固執認為一定得，結果因為自己任性落注，搞到慘敗損手輸錢。
睇番嗰場「薑餅人」劣勢之下最終只得輸兩個半馬位，表現算好好。根本Icy肯冒險落注，多少反映佢一早知愛駒已復勇，又豈會是任性咁簡單？今期（25日）「薑餅人」又再上陣，既然上次12檔都賭，呢次3檔好得多，而隻馬喺三班始終有利，睇嚟Icy分分鐘又忍唔到手落注呀！