政界盛傳特首梁振英動用港大校監嘅權力，刪減港大名譽博士學位推薦名單，其中一個獲薦嘅人係佢死敵唐英年。唐唐噚日出席中總新春酒會前回應，從無收過港大或任何人嘅通知，話港大會向佢頒授名譽博士。之不過，冇聽過唔代表冇咁嘅事喎。
噚日全場男士幾乎個個打紅呔，襯番中總嘅政治立場同新春氣氛，但唐唐就打咗紫色呔，八方問佢係咪力撐今日發表預算案、同樣盛傳同梁振英不和嘅財政司長曾俊華？唐唐望一望自己條呔，面都紅晒話係「偶然箒」，但就話留意到預算案今年係用紫色，笑晒話同曾俊華共事多年，對鬍鬚曾嘅能力好有信心。唔通紫色dress code，已成為政界低調反梁嘅顏色？