仲記唔記得電影《打擂台》梁小龍講嗰句經典對白「唔打就唔會輸，要打就一定要贏」。有份創作呢句對白嘅導演郭子健又有新作，就係講打羽毛球嘅《全力扣殺》。
狂爆星爺對白
呢套片搵咗鄭伊健、劉浩龍、梁漢文拍住何超儀，飾演一班天殘地缺嘅羽毛球手，有聾、跛手、弱視同躁狂症嘅症狀，加埋一個大賊兼酒鬼教練林敏驄，要對付土豪地主鄭中基。
導演郭子健今次想玩懷舊、乞兒look同香港精神，作為周星馳fans嘅佢當然加入唔少星爺用過嘅對白，好似「我淨係想打波咋」、「人點可以冇火」。今趟金句都唔少，其中伊健講嘅「越係做得唔叻，就越係要做」或者林敏驄講嘅「水到渠成，不進則退」都幾反映到套戲。為咗配合勵志呢個題材，電影主題曲仲用埋當年甄妮首名曲《奮鬥》，不過唱歌嘅換咗伊健同超儀。
撰文：馮仁昭