騎士周日作客紐約人，作為今季東岸冠軍大熱門，佢哋當然順利贏波，大炒聯盟榜尾嘅主隊101:83。騎士「大帝」勒邦占士（LeBron James）今場仲超越埋一代偶像艾華遜（Allen Iverson）嘅得分紀錄，繼續喺歷史名冊上留名。
要追拜恩仲差八千分
大帝占士賽前以累積24,365分，喺NBA歷來得分榜排第廿三位，落後有「戰神」之稱嘅前76人MVP艾華遜三分；今場一開波，大帝就表演雙手入樽響頭炮，唔夠兩分鐘之後就靠一次上籃再攞兩分，成功超越戰神AI。由於今場對手實在太弱，大帝只係落場玩廿八分鐘，入咗十八分就收夠籌。佢賽後以累積24,383分升上得分榜第廿二位，下個要超越嘅目標就到佢嘅前熱火戰友三分王阿倫（Ray Allen）喇。
雖然自己嘅紀錄俾人破咗，但係AI好大方咁喺twitter恭喜占士；占士就賣口乖，自稱細細個已經好仰慕AI：「真係好難相信，（超越AI得分紀錄）真係好大嘅榮幸，亦令我感到謙卑。可以同我童年偶像AI相提並論，好瘋狂！」大帝又唔使咁快咁興奮住嘅，只要佢入多八千分左右，就可以超越埋「波神」米高佐敦（Michael Jordan）㖭。而再數上去，得分榜第三位就係兩個月前先破波神紀錄嘅拜恩（Kobe Bryant）；要成為「現役第一人」嘅話，相信占士都想喺拜恩退休前破佢紀錄。
雖然早幾日有美國八卦雜誌聲稱拜恩已經決定打埋下季就收山，嚇親唔少fans，但係當事人前日上《ESPN》接受訪問，已經澄清咗呢單係假新聞，話自己目前都仲未有退休嘅打算。
識睇，一定係睇足英台【英波Live】：
http://soccer.appledaily.com
http://bit.ly/engballlive