噚日大年初五，政務司司長林鄭月娥都開工大吉，着到成個利是封咁殺入紅磡黃埔新邨同黃埔花園，向市民派發政改單張。經民聯梁美芬係當區區議員，雖然林鄭事前冇知會佢，但佢黃昏時分發現街上有警察巡邏，嗱嗱臨落樓一探究竟，結果野生捕獲林鄭，同時自動揳位幫手派埋一份，事後仲發新聞稿，附上多張同林鄭嘅合照，申明係「巧遇」。但「行政長官普選辦法公眾諮詢」嘅官方facebook專頁，上載嘅相就都唔見鼠王芬嘅身影喇。
八方見到林鄭噚日蓮子蓉咁款，唔通政改有轉機？民協馮檢基都話就算有人大框架都樂於見京官，甚至單獨見面，比同其他政黨一齊見更好㖭。阿基呢一張票，林鄭係咪好想要？