大年初一，好多家庭都總動員外出拜年，身兼南旋集團主席嘅港區全國人大代表王庭聰亦唔例外，佢初一就去咗跑馬地同國學大師饒宗頤拜年。王庭聰話呀，如果新年喺香港過，通常都拉隊同饒老拜年，當日見饒老精神都好好。身為饒宗頤學術館之友會長嘅佢仲透露，雖然饒老仲未夠一百歲，但今年十二月都會幫手為饒老喺會展筵開約六十席，擺一場百歲宴，預祝饒老百歲生日快樂。
嚟緊兩會港區人大關注嘅肯定包括水貨問題，王庭聰噚日憶述八十年代那些年，都試過做水貨客，帶過電視機返大陸賣，笑笑口話走一轉，都賺到唔少錢。佢認為水貨問題係靠執法打擊，唔應該一刀切，取消一簽多行。