近期走勢極佳嘅利物浦，喺羊年響頭炮，周日年初四英超作客排名喺佢哋之上嘅修咸頓，賽前預計要搶分可能有啲困難，皆因對手今季對強隊一向好硬淨；不過紅軍個勢真係好旺，憑菲臘比古天奴同史達寧各入一球，以2:0勝出，保持各項賽事十八場不敗之餘，亦升上聯賽榜第六，令前四爭奪大混亂，𠵱家由第三至第七嘅球隊，互相之間都係爭一分，相信未到最後一刻，都未知邊隊可以踢到下屆歐聯。
近百公里飛死角
利物浦今場開賽三分鐘，就靠古天奴一記冷箭得手領先。古仔呢球波射得好靚，離門成三十三碼，個波就好似炮彈咁，時速達九十八點八公里，中楣底彈入，門將費沙科士打都欲救無從；今場受傷缺陣嘅神奇隊長謝拉特，睇完呢球世界波，都即時喺Instagram打咗句「Wow」。最緊要係咁早入波增強咗信心，亦打亂咗修頓嘅部署，加上對方近期最「弗」嘅沙迪奧文尼，因為遲到冇被朗奴高文列入正選，到五十七分鐘先後備入替；之後史達寧喺七十三分鐘再入一球，雙蛋贈修頓。值得一提係，球證今場又判漏十二碼，修頓同紅軍都各有一次，惟有當打和啦！
三至七位僅差距四分
今季暫時未試過有球隊喺英超可以雙殺硬淨嘅修頓，紅軍可以話威晒，兩循環都贏，而且佢哋亦衝上第六位，追到同修頓只係爭一分，重燃前四希望，領隊羅渣士賽後就向曼聯等前列球隊發出警告：「𠵱家能夠同曼聯爭兩分，就知我哋進步幾大，但嚟緊有好多場大戰，都係小心至上。」睇吓𠵱家聯賽榜形勢，由第三位嘅阿仙奴到第七位嘅熱刺，互相之間原來只得一分差距，即係話阿仙奴同熱刺只係爭四分，形勢十分緊湊；如果阿仙奴下輪輸波，隨時又俾後面嘅球隊過番頭。
我求大俠覺得呢幾隊波入面，阿仙奴同利物浦已經復蘇，好有機會憑後勁喺季尾鎖定歐聯入場券；相反，曼聯到𠵱家都仲未執好個form，對佢哋冇乜期望；至於熱刺亦唔夠穩定，同日作客韋斯咸，如果唔係球證喺補時階段吹罰十二碼，追成2:2嘅話，佢哋可能一分都冇。
識睇，一定係睇足英台【英波Live】：
http://soccer.appledaily.com
http://bit.ly/engballlive