今年拜年嘅熱話，肯定包括新民黨主席葉劉淑儀年初二出席車公廟求籤活動時，被麒麟撞飛呢件事啦，花生指數爆晒燈。到底舞麒麟嘅「英雄」係乜水？沙田鄉事委員會執委羅來富噚日大揭秘，話呢位麒麟師傅姓謝，唔係村代表，卻係老闆級人馬，喺穗禾苑有間裝修工程公司，自從飛撞事件後潛咗水，想搵佢打牌發財都搵唔到。
羅來富話呀，當日嘅麒麟隊唔係職業搵食隊，事緣十幾年前沙田鄉委會想搵隊人喺車公廟年初二祈福上香時舞麒麟，佢知灰窰下村有一對謝氏兄弟有學舞麒麟，情商佢哋搵埋其他村民組隊，每逢農曆年出動。
佢席間笑笑口攞住電話重播蘋果動新聞短片，向其他村長重組案情，話當時隻麒麟做緊踏入廟門嘅「拗門」儀式，麒麟頭要左揈右揈好大動作；儀式完咗，嘉賓會跟住麒麟尾行，年年都係咁，出席嘅嘉賓同新界王劉皇發都知碇，唔會搶先行一步，更加唔會企喺麒麟左右兩邊，佢話今次意外係有嘉賓「唔知碇」，但佢哋都會檢討嘅。
葉劉話葛珮帆「口痕友」
除咗鄉紳嫌葉劉阻碇，民建聯葛珮帆年初三同傳媒團拜時，點評葉劉被「麒麟」飛撞事件話喎，事件係教訓大家要識「企位」，唔識習俗就唔好亂企，否則後果「大家有眼睇」。呢番說話似乎辣㷫葉劉，佢噚日喺facebook話，從報章得知有「口痕友」話佢「唔識企位」，先會被麒麟猛撞，佢反駁當時人多擠迫，根本無法「揀位企」，不點名話呢位「口痕友」，「可能沒有了解清楚現場環境」，似乎好介意有人暗示佢揳位。葉劉仲話呀，就算隻麒麟冇撞到佢，相信亦可能撞到其他鄉紳父老，自動獻身話：「如我可以代替鄉紳父老們捱了一撞，亦未嘗不是一件好事。」
李八方
mailto:[email protected]