民主黨除咗有位強悍女主席劉慧卿，原來都有一批廚房男。卿姐噚日同民主黨一班猛男同傳媒新春團拜，副主席尹兆堅及羅健熙、以及創意媒體部部長黎敬瑋齊齊變身大廚，合力煮咗「黃金蝦」、又煎年糕畀傳媒食，個個都有板有眼唔失禮。尹兆堅話年底區議會選舉，預計民主黨會約有百人喺各區出戰，並奉行精兵制，要分別通過考核先至可以參選，佢話唔少年輕人因為雨傘運動而有意參選，有三區會同民主派人士撞區，所以要協調。
有猛男大廚相陪嘅卿姐，一直笑瞇瞇，講到民主黨周五黨慶，卿姐話多得梁振英疑似落封殺令禁官員出席，先令唔少人覺得出席民主黨黨慶係身份象徵，仲反映話未收到請柬，擔心出席唔到有失身份。