新年幾日假期，話咁快又就過咗嘞，花生友喺同政界中人剝瓜子、食糖蓮子嘅拜年時，八到唔少有趣政事同大家分享，其中一樣就係關於亞視。好多人奇怪，點解中央出到面，幫手搵白武士，最後竟然係唔成事？有政界厚多士話喎，之咪就係嗰位亞視主要投資者王征，「獅子開大口」累事。
㩒住呂志和嚟搶
查實之前政界一直有消息流傳，銀河娛樂主席呂志和有意入主亞視，而呢位新賭王亦都回應過，做乜嘢生意都有興趣，證明中央都冇搵錯人幫手，令大家覺得成事機會幾高㖭！但係又點解，傳吓傳吓，好似又冇咗呂志和份？有人咬住粒瓜子同花生友話呀，事出當然有因，並非呂志和冇心。
政圈流傳，其實呂志和買亞視都傾得七七八八㗎嘞，但埋尾嘅時候，王征卻要求多多，要買方孭埋欠薪嗰啲債。嗱，查實幾千萬對新賭王嚟講，真係跌咗都唔多覺，但據聞王征突然提出要求，卻令呂志和呢邊好唔like。有厚多士話呀，呂志和都係畀面中央先幫拖箒，好唔忿氣畀王征當羊牯㩒住嚟搶，最後咪傾唔埋欄囉。
有厚多士冷眼旁觀，同花生友講王征真係好離譜㗎，據佢所知，王征應該係認定中央一定出手救亞視，所以相對中央同特區政府嘅肉緊，真係你急佢唔急、最緊要有錢執，覺得係佢一個人，搞到成件事禍晒，提醒王征因住貪字得個貧。
花生友