羊年伊始，全球華人慶祝農曆年。新加坡華人亦跟中國傳統，一家人齊齊圍埋食盤菜，仲有食「撈起」，寓意越撈越起。香港好多做生意嘅人都鍾意新年食，寓意越撈越起。新加坡同日本一樣，係港人短線旅遊熱點。不過，近來香港同中國旅客都覺得坡紙升值，旅行消費開支提升，三日兩夜嘅短trip，食、住、玩連機票，平均每位最少六，七千蚊，農曆年價格再貴啲。現時滙率約一千蚊港紙，兌換一百七十五坡紙。
其實新加坡生活水平係數一數二高。舊年三月，EIU公佈全球生活水平指數最高國家，新加坡超越日本，排第一位。新加坡同香港一樣，農曆年物價上升。星洲物價原來睇吓豬肉乾價格都有啟示。喺當地豬肉乾叫bakkwa，拜年必選送禮佳品，就好似香港人拜年多數買藍色丹麥曲奇餅一樣。彭博亦有一個豬肉乾售價追蹤指數，綜合新加坡四大豬肉乾零售商售價，好似港人都鍾意買嘅林志源同美珍香等，估算當地生活水平。
今年彭博豬肉乾指數有3.5，係海嘯後新高。雖然新加坡通脹低迷，照計物價會跌。不過，今次通脹低迷主因係油價下挫，民眾受惠燃油價減，釋放消費力，加上新年有需求，令今年豬肉價格企穩。新加坡將會在今日公佈財政預算案，時間剛剛係同香港財政預算案公佈同一個禮拜。星洲預算案表面同港人冇乜直接受惠利益，但當中房屋同社福政策，值得參考。
C+B
本欄逢周一刊出