Trader物語:創造莊家優勢 - 張士佳

Trader物語:創造莊家優勢 - 張士佳

恭喜發財!祝各位讀者羊年身體健康、心想事成!農曆年期間,中國人都會拜訪親友,分享生活的喜與樂,然後畫面一轉就是在攻打四方城,或者是魚蝦蟹骰寶,中國人愛賭是鐵一般的事實。那愛賭與精於賭博有甚麼分別呢?舊時有多套賭神系列的電影,片中主角多數運氣甚好,又或者真係識「變牌」,所以佔有優勢,逢賭必勝。這亦反映多數人覺得,賭錢要贏錢,只基於兩個元素,一係要夠運,一係要「出千」,後者有另類風險,前者則可靠求神或借庫等等方法去催局,亦成為不少賭仔所好。

A股高開沽貨之時

不過除咗靠運外,我哋仲可以科學地拆解大部份賭博遊戲,了解莊家優勢,不止能夠提高勝算,更加可提升投資修為,講到尾,投資同賭博都可用值博率的概念去量化,然後配合注碼控制去爭取回報。以魚蝦蟹骰寶為例,為何做莊可長贏呢?三粒骰的組合變化有二百一十六組,開出一條魚賠一倍、兩條魚賠兩倍、三條魚賠三倍,表象是莊家閒家贏面是一樣。但如果將所有組合列出,再乘以賠率,就會發現莊家優勢為約7.9%,意思係長賭之下,莊家可贏取閒家賭注的平均值。再舉一例,賭場中常見賭大細的枱,每局會搖三粒刻有一至六點的骰,然後把數字加上,四點至十一點為細,閒家買細,賠率為一賠一,十一點至十七點為大,賠率與買細相同。同時間因為有一條規是圍骰通殺,因此在二百一十六個組合中,有六個組合是莊家不用賠給買大細的閒家,其莊家優勢約2.8%。睇到呢個位,相信各位都已經冇晒做閒家的樂趣,既然開賭咁好賺,都係買賭股好似仲值博。
投資同賭博一樣,我哋只可以推測未來會發生甚麼事,計一計出現心目中結果的機率。最不同的地方係,投資是持續改變,不似賭博開彩就知結果。而市場上的各類分析門派,說穿了都是以投資者建立莊家優勢為目標,因此不論是基本分析、技術分析,甚至係近年新興的財技分析的投資者,都會計算值博率,或用多於一門分析技巧去提高勝算。所以各位今年除咗搏殺外,記得要不時強化自身的莊家優勢。
股市方面,上周中港兩地投資者都唔多炒股,成交量跌到去同早一兩年的淡市期差唔多,明顯係已買定離手,等本周三A股開市。既然咁多人等呢件事發生,若到時真係紅盤高開,相信都係套利時機。個股方面,上周再減咗持有多時的REITs,如領匯(823)及越秀房地產(405),始終美國三十年債息上周見了近月新高,港元與美元掛鈎資金成本上升,點都會影響REITs升勢甚至調整,仲揸住REITs不是一件樂事。

張士佳