舊年粉墨登場，處女下海幫星展拍電視廣告，攞住個氣球喺辦公室周圍行，sell走在時代尖端洞察力嘅星展（香港）財資市場部執行董事王良享（Tommy），過完農曆年後，華華都要恭喜佢一聲，唔係為咗逗利是，而係由三月起，Tommy將升職一級，擔任星展（香港）財資市場部（大中華）董事總經理，據聞過年前，該行內部通告已經公佈。
升職後，Tommy依然會繼續睇住炒房業務，之不過會放多啲時間喺中國及台灣方面發展。二○○八年加盟星展的王良享，曾先後任職摩根大通同花旗等外資行，擁有超過二十年銀行業經驗。華華亦聽聞，星展內部通告中，零售銀行業務存款及有抵押貸款嘅執行董事陳偉思（Vivian）亦同樣升咗董事總經理級。