恭喜發財，本欄新正頭祝大家笑到最後！一路中資股上升，本欄喺網上即市評論多次強調，此等市況對財演係最冇癮，因為一路升上嚟，都係大價股，由內銀、內險、券商、鐵路、A股ETF，勉強加埋內房，雖然個別板塊好似券商打咗柴，又或鐵路憧憬過龍，但就算去到二月仍然係幾個板塊輪流炒格局。除非你過年前神勇貼中鱷魚恤（122），否則炒來炒去表現未必好過齋買大價股。所以一路有追高明的戰友，到今日應該一手都係貨。
即使今年相信A股牛市未完，三月前都係一個短暫落車時機：
一、過年前，A股七連升，扭轉一至二月頭頹勢，冇理由咁快炒完，過年前跌唔死，過年後一定有多一轉炒上。
二、舊年中資股升得多，對於嚟緊兩會會有憧憬，三月頭兩會前，一定會覺得中央有好嘢益你，繼而同上述理由一齊炒。
三、之但係，中國國情係未宣佈時吹到大一大，到落實時原來好流。中國境內所有人同埋事，都係用呢種先呃你入局方法，中央依法落實政策一定會符合國情，到嚟真時一定係流。例如，對上降準個市半日升都冇，又例如鐵路股走出去吹到大一大，結果連第三世界墨西哥都搞唔掂，乜嘢一路一帶都係水份為主，炒完即閃。
四、早排本欄已經寫過，過去四年，兩會一開個市就跌，仲要跌一千點上下，今年唔會有例外。原因一當然就係上述國情；原因二就係兩會九萬幾人去開，就算有一句半句令十三億人都震驚的政策，都至少有成億人知先，開會時掟貨俾你。
減貨方法有三
本欄認為今個星期至下個星期兩會開會前會有一輪升浪，今個禮拜要減貨，到下個禮拜升就減，方法有三：
不問價沽，但問時間。例如A股星期三開市前先沽一次，下星期一再沽一次，到兩會開嗰日沽埋；
輸流沽。今個星期炒法肯定同之前一樣，輪流炒，你唔使秒秒睇實，第二朝打開本報財經版，見到全城盲搶內險股，嗰日就沽內險，如此類推。
破頂即沽。大市指標平保（2318）幾次創新高回落，衝破八十九蚊即隊出街；如中行（3988）破4.5蚊，諸如此類。沽貨唔代表睇淡，本欄繼續相信A股牛市，兩會前沽貨僅順應國情，跌約千點後買番晒。
高明
http://www.facebook.com/BigRiceTea
本欄逢周一刊出