我求大俠記得，亞視拖糧係由上年開始，之後就斷斷續續，半份半份咁都叫做有出吓糧，但係意甲榜尾帕爾馬真係衰過亞視，因為佢哋自上年七月已經冇出過糧，拖咗班職球員超過半年人工！星期日，突然傳出帕爾馬破產同降班嘅消息，雖然後嚟證實係啲英文媒體繙譯有錯，報錯帕爾馬「死訊」，但相信佢哋都離死期不遠㗎嘞。
一度傳破產要散班
帕爾馬近年財困，今季終於頂唔順，由開季拖糧拖到𠵱家，其中最大牌嘅前意大利國腳卡斯辛奴俾球會拖欠四百萬歐元人工，早排已經解約走人，但當然仲未追番啲欠薪。星期日，帕爾馬唔單止出唔到糧畀球員，連球場保安都請唔起，所以主場對烏甸尼斯場意甲都被迫延期。另外，仲傳出帕爾馬已經宣佈破產，嚟緊自動降班嘅報道。後嚟，意甲賽會澄清，話啲傳媒譯錯嘢，帕爾馬仲未破產，𠵱家仲吊緊鹽水。賽會仲調查緊帕爾馬嘅財政狀況，會喺下個月十九號聆訊，決定帕爾馬嘅命運。
嚟緊呢個月，如果帕爾馬撲到水返嚟，就可以逃過一劫，可能最多扣分；但最壞嘅情況係，取消佢哋喺意甲嘅比賽資格，嚟緊未踢嘅比賽全部都被判輸0:3，踢咗嘅就維持紀錄，同埋下季降落業餘聯賽，甚至被迫散班。不過，意大利足總都唔想睇住帕爾馬死，據《米蘭體育報》消息，足總計劃借五百萬歐元畀帕爾馬應急，至少等佢哋捱過今季。帕爾馬早前因拖糧已經被扣一分，暫時以十分排意甲榜末，相信就算過得到呢關，下季都要降落乙組。
總監壓力大心臟病入院
帕爾馬𠵱家風雨飄搖，一個星期前，執達吏已經沒收咗佢哋四架球會車輛，連隊巴都冇埋，唔通下場要行路去作客熱拿亞？另外，前阿根廷名將、𠵱家做緊帕爾馬青年軍教練嘅基斯普話，球會已經冇晒清潔工人，又冇交電費，所以球員被迫喺更衣室沖凍水涼，唔少青年軍都因為咁而凍病咗。仲有，體育總監比圖李安納度因為壓力太大，早排因心臟問題入院，𠵱家轉咗去間專醫抑鬱症嘅診所留醫。
識睇，一定係睇足英台【英波Live】：
http://soccer.appledaily.com
http://bit.ly/engballlive