中央領導人不斷口中唸唸有詞：「依法治國」。每次評論香港時局，永遠有一句：「支持香港特區政府依法治港」，依法就是依照法律咁解啦，即係法治，有乜唔啱呀！邊個敢反對？香港人唔係開口埋口講法治，信任司法獨立，極少批評司法機關嘅咩？
且慢，中文講法治就係法治，英文就有Rule of Law與Rule by Law之分，陶傑可以解俾你聽of與by之精微分別，香港人見慣，聽慣與習慣嘅，十分擁戴嘅，就係Rule of Law，但中央領導人口中嘅法治，就係Rule by Law，意義唔同㗎。
講理論，未必明白，不妨舉出一啲真實例子。
國際紐約時報係一張好好嘅報紙，要學少少關於國際關係、國際時事，市面上冇一張報紙及得上佢，佔領運動期間，（INYT）嘅報導既詳細又深入，並非由外地飛個特派員嚟香港採訪幾天咁簡單。有一位年紀不太大嘅富二代問左丁山：「點解香港本地報紙嘅國際新聞全部抄外電，有時更繙譯錯誤？有冇法子做好點呀？」左丁山答佢：「有嘅，叫香港報紙效法NYT派特派員長駐紐約、倫敦、巴黎、黎巴嫩啦，人地BBC與NYT差不多每個世界大城市有特派員（correspondent）駐紮呀，有錢咪得囉。」香港傳媒人當然知道左丁山係講笑話。
根據NYT報導，泰國依法治國，不以槍桿子鎮壓反對派，而係透過議會通過嚴苛法律，跟住就根據呢啲法例（依法）叫晒他信一派嘅政客簽署「法律文件」，聲明一旦從事政治活動，就會違反乜乜物物，會被政府檢控，他信支持者一簽咗，等於政治上舉晒白旗，從此政治隱形，泰國軍人領導政府成功「依法治國」。跟住係馬來西亞，政府不斷利用司法制度控告反對黨領袖「雞姦」下屬，最近又「成功檢控」，將安華送入監倉，結束佢嘅政治生涯，安華以前曾經以雞姦罪名入冊，受過慘痛教訓，出咗嚟過番正常生活，又膽敢再次雞姦下屬？真係信不信由得你，馬來西亞既有此法律，政府係依法治國嘛。最新一段新聞係印尼，印尼係東南亞最貪污國家，人所皆知，反貪機構KPK打貪絕不手軟，但六十年來，印尼貪污之風不減，新總統維多多上任後，委任一位三星警察上將為全國警察總監，KPK即刻宣稱呢位上將係佢地調查已久嘅貪官嫌疑犯，於是上將不能升官，但警方立即拘捕KPK嘅副主席，指佢在2010年身為律師，唆擺證人提交假證供。咁玩法，問你暈未？呢，又係依法治國吖嘛。