羊年第一日開工，大家係咪仲有啲holiday mood，仲未全面喺作戰狀態？花生友放完幾日假，反而充咗電，但論到勁力，肯定唔夠撞親新民黨主席葉劉淑儀嗰隻麒麟嚟，因為麒麟呢無心一撞，實在非同凡響，成為政界拜年熱話。
葉劉飛撞嗰一刻令唔少政界中人目瞪口呆，事關嗰吓衝力極大，如果葉劉唔係有鄉紳扶住，早已「瞓低」。嗱，新年流流就「瞓低」，係咪唔多老利先？部署緊去選特首嘅葉劉，出師未捷先「瞓低」，真係大吉利是咯！
未講明立會選舉部署
有啲人質疑隻麒麟刻意衝撞，唔like葉劉疑似揳位企喺最前排，花生友就此向籌辦香港龍獅節嘅民建聯陳鑑林請教過，佢話麒麟舞動時主要左右揈，同舞獅前後郁係有啲唔同，所以葉劉被「隔籬」嘅麒麟撞到唔出奇、唔相信係刻意嘅。
至於葉劉點解咁博，大年初二好哋哋唔放假，卻殺入沙田喺車公廟外同公民力量成員派風車兼之後陪住入廟求籤，唔通真係為咗同市民近距離拜年咁pure咁true？有政界中人話呀，葉劉至今未講明下屆立法會選舉部署，都係因為要知道有冇機會出閘選吓特首，而同為特首熱門、葉劉口中嘅「妹妹」林鄭月娥，大年初一已經亮相同市民拜年，試問葉劉點可以唔喺初二出現以便同林鄭平分秋色，只係無人會估到，一隻麒麟將佢嘅好事變𤓓聞。
花生友