【中環】袁彩雲二○○九年嫁予加拿大籍餐廳老闆江銘峰並定居溫哥華，育有一名女兒Alysia。最近趁農曆新年假期，一家人返港探親。昨日袁彩雲帶同歲半大囡囡，同行還有幾位親友，一齊去了中環的友邦歐陸嘉年華，但卻不見她老公的蹤影。已經舉辦了約兩個月的嘉年華昨日去到尾聲，加上是假期，市民都趕住入場玩，所以中午時分，排隊人龍由七號碼頭排到去天星碼頭對開。終於入到場玩的袁彩雲抱住眼仔睩睩超可愛的Alysia，排隊等玩小飛象，Alysia一臉好奇，不停四圍望，而媽咪就非常有耐心講解，又肉緊錫錫囡囡。
「老公唔舒服」
陪囡囡玩完小飛象之後，彩雲似有點倦意，將Alysia交給妹妹抱，姊姊和兩名同行男士就去買pizza醫肚。食完pizza之後一行人繼續玩其他遊戲，Alysia似乎對水槍遊戲好有興趣，廿四孝媽咪彩雲發現即抱囡囡走近觀看。記者上前跟袁彩雲打招呼，她笑說：「本來老公都嚟，不過佢唔舒服，所以就同埋家姐細妹屋企人嚟囉。今次返嚟過年，會留到四月至走，如果有活動邀請我出席都可以㗎。」
採訪：藍文浩
攝影：仇志德
