《華爾街日報》報道，中央可能會將中石油集團與中石化集團合併，中海油集團與中化集團合併。受傳聞影響，中石油（857）同中石化（386）喺上禮拜三半日市升逾3%，中海油（883）亦升2.7%。A股休市，不過內地股民向來對呢啲傳聞寧可信其有，睇怕後日開市，都會成為炒作理由。
呢單傳聞究竟有幾堅？睇面數，似乎完全唔合理。首先，之前南北車的兩大合併理據：加大研發，以及避免海外市場割喉式競爭，喺中石油與中石化身上並不存在。呢兩家係資源性公司，而非注重研發的製造企業，合併唔會帶來協同效應；另外，油價唔係中國話事，就算中石油中石化合併，喺海外市場亦唔會帶來着數。更何況，中石油同中石化都係部級企業，地位遠高於南車北車，國資委好難以指令方式搞合併。
不過，《華爾街日報》報道中有句話可圈可點，話習近平視搞大國企為提升中國國際地位的關鍵。習近平心思會係點，外界好難猜度。如果佢真係覺得要好似英國石油或者荷蘭蜆殼咁，一個國家只有一間國家石油公司先至夠威，乜嘢理據都要行埋一邊。問題係，要搵習近平出來否認話有呢個意圖，的確好難，所以恐怕都會炒一輪。
李可強