民建聯蔣麗芸二○一二年殺入立法會後，憑住真性情下嘅獅吼功多咗個外號叫「元秋」，知名度激增。但元秋除咗獅吼功了得，原來都唱得兩嘴，而且嗰把低沉嘅聲線，聽起上嚟幾似百變歌后梅艷芳，仲聽到佢老公梁海明都如癡如醉，唔知細妹蔣麗萍有冇過番幾招唱歌秘技畀家姐？
話說元秋噚日約埋傳媒喺佢西九嘅家、千四呎嘅漾日居豪宅搞新年團拜，二○一三年用二千幾萬買呢個單位嘅元秋，話想買埋樓下單位㗎，可惜業主唔肯賣。新年送大禮，元秋即席獻唱無綫經典劇集《香城浪子》主題曲、梅艷芳唱嘅《心債》：「重重心中癡債 原是欠下你一世 無限無盡愛在我心底……」揸起支咪嘅元秋非常投入，唱到瞇埋晒眼，老公梁海明則全程坐喺窗台後面默默支持，可能係畀元秋嗰份歌聲中的愛意感動緊。
入立會做番自己
據知元秋都幾鍾意唱歌，而做得政治人物，又點會無番兩三首名曲行走江湖？除咗梅姐，佢都愛唱鄧麗君嘅名曲，但都係唱梅姐嘅歌較神似，可能兩位都係豪氣女，八方估計下次可能唱埋梅姐嘅《妖女》喇。元秋話喎，以前一直以企業家形象示人，做生意唔鍾意對方、都要笑面迎人，估唔到入咗立法會反而可以做番自己，就算拍枱鬧人損形象，化身元秋都無計，最緊要係be yourself。
佢仲就夫妻相處之道向一眾行家教路，話要畀空間大家，喺屋企要各自有own corner，而噚日幫手招呼傳媒朋友嘅梁海明，一直笑迷迷，相信元秋待佢不俗。
李八方
mailto:[email protected]