倒數英倫朝聖之行仲有幾日，未出發已經好興奮，因為喺茶會見到咁多球迷出現，就知道呢次真係難得一見嘅朝聖團，報名出發嘅六十位球迷之中（圖），團結嘅利記迷人頭最多，曼聯迷緊隨其後，倫敦Big 4就人少少但各有代表，加埋台前幕後十幾位兄弟姊妹，睇怕上機之後隨時嘈到飛起。
之所以嘈，並唔係針對一班球迷團友，而係因為同行嘅一班講波男女，一來講嘢係佢哋嘅專長同興趣，二來今次佢哋個個都拋開講波焗住持平嘅包袱，做番真球迷，仲分別去睇自己愛隊比賽，唔嘈就怪。
嗱Peter黃究竟係捧邊隊嘅呢？原來Peter係車仔fans，講到明要去珉布萊睇摩連奴捧盃喎，搞到原本有啲心儀熱刺嘅車車都俾佢感染到，都話可能會倒轉槍頭。一大班利記fans出發前已經整定兩張大banner，準備喺晏菲路同謝老四say goodbye，之不過謝老四養傷中，要見佢分分鐘要喺練習場打躉。好在有Kelena帶路，加埋城市獵人咁款嘅強尼同行，見謝老四應該走唔甩嘅。曼聯方面，依雯之前話去過奧脫福好幾次，但未試過現場睇曼聯可以由頭坐到尾，今次可以嗌番夠本，仲有成二十個香港朋友仔坐隔籬，諗句廣東話口號嗌吓都好喎。
個個講波男女都各據一方，咁有冇中間路線唔使咁激呀，有，體育王子伍家謙不嬲持平，所以萬一香港同學會有乜拗撬，就係佢出嚟掃場嘅時候。仲唔得就等join埋我哋嘅Martin Tyler主持公道，佢老人家眼中，隊隊球迷都係咁可愛。
至於最young嘅妹頭同柏霖，唔知係咪兩位都有阿仙奴fans嘅特質，所以都會睇完英超再stay多幾日，一齊闖蕩歐洲，同阿記嘅歐洲夢目標一樣！
唔記得講我隊韋斯咸，今次有團友同行告別烏普頓嘞，雖然係一個咁大把，都已經可以話係never talk alone啦！
KEYMAN
節目主持