每逢農曆新年，我有很多不同的朋友，都會在家裏搞一些小賭局：魚蝦蟹、大細、廿一點、射龍門……等等，令人嗌破喉嚨的遊戲！所以小妹農曆年一定不會出埠旅行：一來貴，二來我可以幾時出發就幾時出發，不用同人逼也不必捱貴機票！而且因為自己非常喜歡春節的氣氛， 尤其是可以享受合法打劫（𢭃利是）！
記得一年我們在朋友家玩魚蝦蟹，連莊家都有貼士派，新奇哩？莊家說：「會游水嘅！」嘩！咁大個貼士！一係魚、一係蝦、一係蟹啦！於是我盡地一鋪，「大嗱嗱」二十蚊走去買蝦！然後我不停大聲嗌：「蝦、蝦、蝦、蝦、蝦！」此時，管理員走上來，說接到投訴，話有人笑得太大聲，可唔可以降低聲量，當時大家都忍不住笑，我嗌「蝦」就以為我笑得大聲，屋主說：「你要拉就拉佢啦！得佢一個買蝦咋嘛！」管理員呆了：「咁希望你哋贏得細聲啲啦！」「唔好意思呀！」
令人心臟停頓的射龍門
另一年，另一次賭局，我們一夥人在另一位兄弟家設賭，玩的遊戲是隨時令人心臟停頓的射龍門，我們大概有二十多個人玩，注碼五大元，但加加埋埋個pool就會好甘㗎啦！當時小妹應該第一次玩，不知天高地厚及何其恐怖！大家都應該知道射龍門的規矩啦：給你派三隻牌，如果第三隻牌在頭兩隻牌中間就當你贏，以外的，就當輸，若然派第三隻牌跟你其中的頭兩隻牌一樣，就要賠double落個pool度！所以個pool越大我們可以攞的錢越多，這就是最危險之處了！
小妺第一次玩，玩了三rounds就開始緊張啦！輪到我，派Ace — King喎，全場譁然，因為這是最大機會率攞走整個pool的錢：「買幾多？」「買晒！」氣氛好緊張……怎料，第三隻開出來的牌是King！撞柱了！要賠double！要賠枱上面那個pool的總和的雙倍金額！嘩！這個「嘩」比頭先嗰個「嘩」更大聲！當然啦：「唔係乜嘢叫做double呀？！」此刻好友計算出整個pool的總和是六百大元，那麼我就要白白奉上一千二百大元了！恐怖了吧？
賭運急轉彎倒贏二千蚊
而最恐怖的是，此乃前奏而已，又輪到小妹了，四 —Queen，又是一個無敵chance面！「你又買晒呀？」「買晒！」「好！果然爛命一條！」結果……又撞柱！數一數，嘩「大嗱嗱」三千蚊！「我冇帶咁多現金喎！」「寫當票啦！」這班好友真凶狠！小妹此刻直頭嚇到掌心冒汗，雖然除了我撞柱，其他人都有份撞，但我的撞柱率是直達100%！有冇搞錯？「又輪到我哋嘅地獄黑仔倫嘞！」馮德倫大大聲說：「嘩！又三同King？」「嘩！我就嚟心臟病發㗎啦！」「買唔買晒？」「今次唔敢啦！我淨係買番我張三千蚊當票！」「好，開始忍到手啦！」點知……再撞！嘩！朋友間都開始替我不值，但冇辦法，遊戲規則如此，他們惟有很貼心地，就算「射中了」也不去拿小妹的當票。好，又寫多張六千大元的當票！
當時，我已經輸到全身發冷，心想：「輸咁多，點還呢？呀，最近接咗個電影分場嚟寫，有一萬五千蚊酬勞，都夠還嘅！」就在這個時刻，地獄黑仔倫賭運急轉彎，贏回一張當票後、再贏埋另一張，最後，還倒贏二千蚊現金！！皆大歡喜嘞！
這次射龍門，是小妹今生以來玩過最刺激的過山車！以後都怕怕了！而現在每年我的好友玩射龍門都會提一提我：「地獄黑仔倫，玩唔玩呀？」
【風人院】
撰文：杜如風
旅遊節目：《流行東京1,2》阿四，《風行全世界1-5》幕後黑手，《流行首爾》 眾矢之的。著作：《風行糸列1-7》
本欄逢周日刊登
