意頭馬繼續開，第六場三班千二米由告廐「精壯神駿」勝出，這匹四歲澳洲自購馬，上仗初出得殿軍，呢日再出即贏，鞍上人郭能停賽復出後第四次賽事終於贏馬，羊年有好開始；而馬主袁仕傑過去養過一代馬王「好爸爸」，該駒09年奪香港一哩錦標後，袁仕傑相隔五年多才打破頭馬荒。
今場鄭俊偉與杜利萊合作的「仁仁友福」近兩場都上名，呢場竟然冷到11倍，於最佳拍檔杜利萊胯下孭133磅，沿途放頭主宰步速，頂得住大熱門直路於內欄塞車之「正大光明」，卻頂唔住從外叠長驅直進之「精壯神駿」屈居亞軍，「仁仁友福」唔能夠連續兩年於初三贏馬。
容廐「正大光明」最為失運，塞足大半條直路，久休復出只輸頸位跑第三，若非取位欠順應可勝出，此駒上季兩戰兩勝，今次乃久休8個月後歷來第三次上陣，竟有如此好表現，反映實力大超班；而這場第四名係「明多多」，四重彩派近六千八百元。
袁仕傑指出「精壯神駿」是由朋友挑選來港，今仗排檔有利，賽前有點信心，告達理訓練得好亦值得一讚。