俄羅斯盧布大幅貶值時，俄羅斯人湧去銀行將盧布換成美金同歐元；瑞士宣佈同歐元脫鈎時，瑞士法郎兌歐元急升三成，瑞士人同樣湧去銀行將瑞郎換成歐元。兩個看似相反嘅事件，卻有相同結果，點解會咁？
萊茵河橫貫歐洲六個國家，經過多年爭鬥，萊茵河終成為多國邊界。有邊界，就有利差。唔同嘅經濟環境、政治制度、貨幣系統、人文風情，都係一種套戥空間。盧布同瑞郎兩個事件看似相反，卻有同樣結果，因為俄羅斯人驚盧布跌唔停，買嘢越來越貴，所以盡快沽盧布揸美元，怒斥美帝主義係紙老虎；瑞士人則驚瑞郎急升曇花一現，快快趣換歐元去消費，早買早享受，遲買貴幾嚿。
萊茵河畔有兩個城市，經常會見到人一袋二袋咁往來穿梭，一個係德國、瑞士交界嘅康斯坦茲（Konstanz），另一個德國、法國、瑞士三國接壤嘅萊茵河畔魏爾（Weil am Rhein）。法國、瑞士物價比德國貴，所以法、瑞人喜歡到德國購物，康斯坦茲有商場、有outlet，萊茵河畔魏爾則有百貨公司Rhein Center。德文Rhein，即中文所譯之萊茵。
法、瑞人要咩情況下先唔會湧去德國邊界購物？不外乎距家太遠、慳埋唔夠畀油費等等。喺咁樣嘅情況下，又會有人睇中人們所需，衍生網上代訂、集運等公司。價差空間有幾大，決定咗有幾多人可以靠此搵食。一日價差空間未填平，上述情況都唔會消失。
各國都歡迎遊客嚟買嘢，但凡事都有「量」嘅問題，並唔係一句促進經濟就可以扮睇唔到。香港可以喺邊境設立大型水貨站，叫「羅璽」、「落馬上林」、「御．沙頭」等任何認為好聽嘅名，呢部份似乎已在規劃。
然後考慮成立Reit，將收租所得派發畀投資者。大眾對水貨客嘅不滿始於擁塞同不便，將擾民程度降低，再將呢種擁塞同不便轉化為利益派番畀民眾，不知是否可行？當然，香港嘅水貨客現象唔純粹係價差問題，亦牽涉內地人對產品嘅質量、安全性憂慮嘅問題，此部份日後再談。
Mr. Tregunter