賓架E在中環打拼之時，忙於為私募基金投資者搵錢（亦為自己搵埋一份），除咗經常去聽音樂會之外，好少其他活動，遑論參加社企回饋社會！現在退咗休，唔講集資搵錢嘞，就可以講吓回饋社會，盡一份社會責任。
左丁山與賓架E都係讀經濟學嘅，一講企業社會責任，就會記得佛利民嘅理念：企業之唯一（注意，係唯一）社會責任就是為股東利益追求利潤最大化──在各種道德，法律制約（constraints）範圍內。
經濟學家一講最大化（maximise），必定係講在制約條件之內，即所謂subject to constraints，在微積分，沒有制約的最大化數目就是無限大，現實社會必定有好多制約，法律上的、人才上的、資產上的、競爭上的、科技上的、道德上的，在種種制約條件規限下達到利潤最大化，就是將公司管理發展到淋漓盡致，要達到利潤最大化，相當不易，管理層不應分心去搞業務外活動，故此佛利民講到企業不要搞慈善，不要搞社會活動，總之要賺到最多嘅錢，派股息俾股東。股東交完稅，鍾意捐款做慈善，做乜都得，企業不應在派股息前，先將利潤一部份捐咗出去做慈善及無生產性之社會用途，導致可派息現金減少。
賓架E當然深明此理，佢搞私募基金，投資於不同生意之前，身為投資者，又身為受私募基金投資者信賴嘅基金管理人，當然熱切於為投資者爭取最大利潤，點可以分身分心去辦社會企業或推動企業社會責任吖，遵守所有現實制約條件嘅企業就係良心企業，明知公司冇錢出糧而繼續混下去，明知會害人而繼續賣冇營養奶粉，賣地溝油食物，賣假藥，網上賣假貨嘅企業，即使猛講企業社會責任，猛講推廣環保嘅公司，根本就係無良企業，應受唾棄！香港現在追趕西方潮流，講CSR（corporate social responsibility）大公司設立CSR部門其實就係另類公關包裝。香港企業家之中，捐獻最多嘅應該係李嘉誠（透過李嘉誠基金會）與已故邵逸夫爵士（捐予教育）。李嘉誠可能係最接近佛利民理念嘅善長，長和系素來不大多用股東嘅錢去辦公益，但佢私人全力支持嘅李嘉誠基金會（成立於1980）就至到目前，一共捐咗150億元俾教育、醫療及大學方面，其中九成用於大中華地區。有啲人用公司錢捐幾萬銀俾學校就聲氣多多，根本係小人物，也是小人。