今日大年初四，先恭喜大家發財，逢關過關逢膽中膽，刀仔鋸樹馬會破產。今年過年竟有四日假期，最開心莫過於打住牌、開賭檔再同時睇波，一年一次半夜三更鬼殺咁嘈都冇人理。一到過年，晏晝冇乜嘢做，開個電視就睇賀歲盃，記得九十年代到二千年代，都好多二線球隊嚟過香港踢，最記得有洪都拉斯、挪威、伊朗、埃及之類，睇世界盃時硬係覺得佢哋好魚腩，但落到大球場對港隊都有功架。
最記得係二○○五年新年，巴西（圖）對港隊，巴西喎！細哨朗拿甸奴喎！當日除咗啲飛炒到貴晒之外，我記得個個朋友屋企都開住部電視，係男人嘅都埋位，手背巴西肉手掌香港肉，一方面想睇巴西技術性大炒香港，另一方面想香港力守成功同破到蛋，最後巴西贏7:1，過程當然精采，但港隊入嗰一粒竟然戲劇性於臨完場由李思明抽入，結局皆大歡喜。（風水輪流轉，你又點會想到巴西上年世界盃又會1:7輸畀德國？）
新年離唔開賭，其中一樣叫「射龍門」。玩法唔使我多介紹，但有冇發覺，大大注落去通常都中柱，然後彩池好快就幾何級數上，跟住成班人就等個機會一次擸晒。如果你識計機會率，就知道呢個遊戲贏嘅機會偏低，即使「A」「K」都好易中柱賠雙。一句講晒，執少少好收，留錢買真波好過，祝逢賭必勝，逢勝必大。
梁栢堅
填詞人+彩池人