新年流流，雷神唔甘心場場做啦啦隊戥人高興，跑至第八場一班1400米賀年盃佢終於贏馬，策騎蔡廐「驌龍」一擊即中，睇住大熱門灰色神獸「和順超影」嚟食，拉士百幾米齋推將對方追過，雷神在港首次勝出賀年盃，更將個人連勝紀錄，推前至連贏12個賽日共取27win，而訓練「驌龍」之蔡約翰，亦都連勝八次賽事。
「驌龍」沉咗好耐，對上一次贏馬已經係2012年12月9日，今場雷神接手化腐朽為神奇，幫此駒打破悶局，馬主乃葉愛愛與其丈夫劉業強組成的「葉劉」組合，兩人捧盃做咗羊年賀歲賽主角，而呢匹七歲老馬亦取得服役第九捷。
眾所周知，劉業強係新界王劉皇發之子，發叔初二於車公廟為香港求簽唔算理想，好在呢日佢公子隻馬建功，氹番發叔開心，發叔亦現身拉頭馬。
有人快樂有人愁，潘頓此場騎「和順超影」留放一絕，呢隻四歲灰馬刻意放棄香港經典盃及打吡，對賀年盃志在必得，可惜功敗垂成輸半身位，來港一出即勝後，連續三場跑二二三三未能再贏。今場第三名係另一隻苗廐馬「好健康」，此駒姍姍來遲追唔切，衛冕賀年盃落空，第四名係「夢仙」。