每年初一，除非外遊，否則必到大球場睇波賀歲！今年亦不例外。道左相逢，一齊抽煙，又見着不少資深球迷。少不免滄海桑田話一番，慨歎賀歲波每下愈況，要派球票充撐場面，尚且入座不夠兩萬之眾，與以前由嘉士伯贊助相比，簡直雲泥之別。就在十年前一役，就是巴西國家隊壓境，寓賽於操，大、細哨兩位當時得令球星映照緣茵，羅賓奴（左）、卡卡、卡路士、卡富，破網七回，賓主盡歡！
由上世紀八十年代初，香港外援宿將「耶穌」退役後轉任評述之餘，潛心主理賀歲波事宜，遂由隨便找一些歇冬的歐洲球會來港「度假」，到精心尋求當打之國際勁旅角逐，而賽制亦因而改變，棄勝負無關痛癢之表演賽，爭盃奪獎的賀歲盃，球隊戲金多少，取決於戰績如何，為名為利，自然抖擻精神，不容有所閃失！
在綽號耶穌的居理先生悉心打救下，賀歲波果然復活，成為一項球迷擁戴、客隊尊重的國際盃賽，尤其在世界盃年，往往有不少國家隊到港參賽，藉此寓戰練兵點將！二○○二年一鳴驚人的世盃季軍土耳其，就曾於年初獻技賀歲（編按：應為回歸四角賽），雖然不敵南非國腳而飲恨，但其機動快捷，已令球迷眼前一亮。然而，好事多磨，足總見賀歲盃年年叫好，竟以為居理不過「過河濕腳」之經紀，不知其刻苦鑽營，經年聯絡，以打造嘉士伯盃之品牌之功力，實非塘邊鶴「講就天下無敵，做就有心無力」可比，竟然趕走耶穌，自行主理賀歲波，乃是愚而自用使然！
以波論政，歲末當局硬闖立法會，強立創新及科技局失敗，又何其相似。狼英扮老虎，當市民羊牯！係咪有病？
長毛
唔扮尊貴，我係球員