伍家謙留守無綫十一年，當了四千多天「體育新聞王子」的他，於剛過去的馬年毅然離開工作多年的崗位，伍家謙說：「對體育新聞呢個行業仍然有熱誠，只不過想有唔同嘗試，凡事行快一步。」踏入羊年，體育新聞王子搖身一變成為娛樂圈新貴，擁有六呎二的身高，加上俊朗外表，勢必迷倒一眾妹妹仔，殺出一條新血路。
撰文：鄉奈仁
近日特首的新年賀辭，希望大家能夠有羊的特質，暗指港人要服從，要有羊群心理跟大隊。現年三十四歲的伍家謙卻反其道而行，拒絕做跟大隊的羊，皆因他初入行，便遇着名師伍晃榮指導，從而成就更出彩的人生。
去年無綫新聞及資訊部風起雲湧，當足十一年「體育新聞王子」的伍家謙選擇離巢，當時他否認怕秋後算賬，只是希望作更多嘗試：「我唔甘心永遠留喺同一個位置，人生要精采就出外闖，我好記得恩師伍晃榮同我講過『做嘢永遠要諗吓點樣比大隊行前少少，非必要都唔好跟隨大隊』，我覺得有時比人行前少少，或者可以睇得更多。」
所謂同姓三分親，伍家謙秉承恩師伍晃榮輕鬆風趣的報道手法，憶起與這位前輩共事的點滴，他百般滋味在心頭：「伍晃榮做嘢好認真，要求非常嚴格，初初入行嗰陣成日俾佢話唔識包裝新聞，嗰時我都真係有啲𤷪𤺧，試過寫一份講稿俾佢彈足三次番轉頭，最激氣係佢每次都唔會講原因，試過有次捱咗一晚通宵交稿，佢都話我做唔到佢要求，話我原來仲唔明白佢想要乜。」
由當年體育組新秀，到今天被封為「體育新聞王子」，伍家謙現在自然明白恩師當年的一片苦心，他笑道：「嗰陣淨係掛住寫稿，冇留意到講稿同畫面配合得唔好，只係識得嬲，梗係抵鬧啦！不過伍生係有讚有彈嘅人，有次做完直播接到佢電話，以為佢又想鬧我，點知佢笑住同我講『你𠵱家可以話畀人知，你識我喇！』」
悼恩師最沉重
二○○八年四月十七日，伍家謙永遠不會忘記這個沉重的日子，那一天，他痛失了一位與他朝夕共對的良師益友，他說：「四月十七日本來我放假，因為公司知道我同伍生最熟，又知道佢喺彌留狀態，所以叫我返去幫手整理生平，我哋經常都要準備呢啲資料，但估唔到我要整理嘅生平，係一個我咁熟識嘅人，最後喺我整理資料期間，已經聽到台前做直播嘅同事宣佈佢死訊。」
當體育新聞主持多年，觀眾對伍家謙的印象僅限於「上半身」，不過，去年底已回復自由身的他，極速殺入男模界分一杯羮，不少粉絲驚覺家謙哥哥原來昂藏六呎二，可惜王子名草有主，前年已成人夫。