一位在大學主修經濟學嘅退休賓架，雖云退休，其實只有五十幾歲，佢一畢業就入銀行做事，中間雖然經歷過銀行重組、合併等事件，但有驚無險，始終憑本領與誠實，得到境外投資者信任，唔做銀行就做私募基金啦，反為搵銀成績仲好，可以未夠退休年齡就離開中環，到新界清幽之地靜居。
新年前碰到佢在中環飲茶，到八珍、陳意齋、奇華辦年貨，左丁山對佢講：「唔怪得到年尾中環咁鬼塞車啦，中午時分，中環中心門前皇后大道中一段塞到水洩不通，連你咁嘅隱居人物都出城噃。」賓架E笑笑口話：「喺慣中環出入，我諗起為太太買年貨就只知道嚟中上環，久住新界，出番嚟一陣都覺得好嘈吵，但又令我有番啲drive，為回饋社會盡番啲責任！」
呢樣就時興噃，有時間有能力唔憂米之士，最好為社會做義工，協助有需要人士，賓架E話：「我自小家窮，睇見班上有啲同學仔學鋼琴、小提琴，羨慕到不得了，但始終無緣學上手，因為一講就俾阿爸鬧：阿仔，有錢俾你交學費已經偷笑嘞，仲話要學鋼琴？我依家好發燒聽鋼琴演奏會，產生一個意念，就係搵社工合作做outreach，佢地搵有興趣學音樂嘅清貧兒童，我去搵人捐款、籌款，我自己又捐一啲，搞貧童音樂班。學費全免，樂器由音樂班提供，你認為如何？」左丁山梗係話好，即刻同佢諗咗一個政治正確嘅英文名稱：Music for The Underprivileged Children，如果佢搞得成，免費同佢推廣，義務宣傳。
返到寫字樓，曾經搞過社會企業嘅財務L打電話嚟大罵亞視葉家寶等人公然無視公司法，開記者招待會講一人一股撐亞視，有公開集資成份，簡值離晒譜，佢話：「呢班人事前有冇問過律師㗎？我地公司如果咁樣出嚟講嘢，證監會立即找上門呀！」亞視劇情曲折離奇，如編劇家天馬行空，諗佢唔到，無謂用正常財務邏輯評論。左丁山匆匆將賓架E理念講一次，問佢意見，財務L話：「理念幾好，但以我搞社企經驗，社工未必係最佳合作對象，社工有個天然傾向，就係問政府攞津貼撥款辦事，唔識得、唔願意搞自負盈虧嘅持續性發展模式，不如你叫賓架E搵大學生合作啦，學生可能更加熱情投入！」