呢日大年初二假期，到場督操嘅練馬師唔多，最特別及最矚目，一定係葉楚航馬房有五匹初三戰馬，由出賽騎師親策往大圈出跳，作最後備戰，擺出一副搏殺格。分別是薛寶力試「一心一意」、「天才」；潘頓操「佳景名駒」、「琪麟穎」；以及柏寶為「實業風采」考驗。
其中薛寶力只係操上述一對馬，冇為其他馬服務，特登犧牲假期，足以反映佢對「一心一意」、「天才」必有期望。
講番葉楚航，CALL齊三位好手到場試馬，佢自己亦好緊張，天未光已到場打點，亦由於當時天色較黑，第一兩匹戰馬出操時，佢為咗睇清楚啲，刻意走到去欄邊用望遠鏡吼實馬匹出跳過程。其後到空檔時，航哥又守喺烽火台，等三位騎師返嚟，聽取佢哋匯報馬匹進度，兼共商搏殺大計，都不知幾認真。
睇番上述葉廐五匹戰馬，唔少都係質新當起，好似「天才」，上仗首次上陣欠熱身，出閘緩慢之下，亦後追甚勁輸唔夠一身位，今次操足再出排三檔，唔怪得薛寶力犧牲假期都要到場摸實。至於柏寶嘅「實業風采」，已一連四仗非冠即位，隻馬中長途實力有目共睹，爭打吡入場券最後機會，一定搏甩髀啦！