羊年拙欄初次亮相，先祝讀友波路亨通。今晚重點，放喺英超走勢最劣嘅阿士東維拉身上；換帥後上仗即見起色，返聯賽迎中游分子史篤城，希望佢哋羊年重振雄風，發霉變發「維」。
計班底，維拉唔曳，跌到入尾三降班區，冇辦法唔郁走、去季簽咗六年半長約嘅原領隊林拔。最後揀咗未攞到歐洲足協專業教練牌照嘅舒活掌帥，博埋餘下十三場聯賽。睇番舒活，上季替波亞斯頂熱刺半季，初嘗頂級教波經驗，錄得近六成勝率，數據係薄啲，但都叫做熱刺近年最強領隊；除咗激活前朝眼中釘艾迪巴約，最終令後者成為球會上季聯賽首席射手，又發掘到哈利卡尼同非洲小將賓達納上一隊，。
維拉全世界皆知，唔識入波，二十五場入得十二球，全英四級聯賽中最差；不過舒活上仗足總盃做座上客，佢哋主場即刻贏李城2:1，尤其下半場更衣室出番嚟，明顯打出鬥志；後防又有荷蘭大將華亞爾復出，只要舒活能夠令今季只得兩個聯賽入球嘅賓迪基（左），喺前線打番起，隊波有救。
對手史篤城上仗點解喺足總盃大敗予布力般，有睇過會明白；攞唔到「燕梳」球入2:0，又突然踢少個，下半場兵敗如山倒。雖然大敗有疑點，但喺聯賽處中游，目標模糊嘅史軍中路防線經過上仗，冇埋傷咗嘅蒙尼沙同停賽嘅謝夫甘馬倫，加埋隊長梳爾哥斯未好晒，主隊箭頭賓迪基同復出嘅艾邦拉賀要好好把握咯。
平手盤，維拉可做膽，坐和望贏。再選，取兩支下周中要踢歐聯大戰嘅強隊，聯賽重要性更大，冇得留力。曼城傷疲盡起，又有隊長耶耶托尼，帶埋藍月亮新簽尖刀韋菲特邦尼從非洲歸隊，主場可炒紐記；至於阿仙奴作客有朝氣嘅水晶宮表面唔易踢，但其實只要箝制到對手兩翼恩歷克波拿斯同賓捷安，水晶宮進攻賣點唔多。還有最重要水軍近期重用挪威老中堅軒治蘭特，不過這位前富咸球員，上季兩鬥兵工廠皆正選，富軍共失五球；面對大勇嘅客軍中鋒基奧特，老軒唔易應付。
波神
神級攻略 智破足彩