新春好多情侶及夫婦結伴拜年，但Cally鄺美雲呢排就唔可以成雙成對咯，大家都知佢同拍拖三年嘅恒基高層林達民分手冇耐，不過再見亦是朋友，Cally亦係大忙人節目多多，咁多朋友陪佢，相信心情已好番八八九九。何況Cally嘅情人其實仲有四個，分別係佢三頭愛犬Cash、Euro同未夠一歲嘅阿Bank，仲有住喺沙田嘅愛駒「甜蜜鑽石」。
Cally感情生活失色，但「甜蜜鑽石」陣上演出就大有起色，隻馬來港後9戰，頭8場都不入三甲，以為入錯貨之際，上仗初戴眼罩表現判若兩駒，排外檔大半程包尾，點知一條直路殺上，好似炮彈咁勁得季軍，明顯進步開始適應水土。
「甜蜜鑽石」今次改配韋達，可以話同Cally再續前緣，事關Cally首次贏馬，正係韋達07年策「甜蜜福星」建功，之後冇再為Cally個人嘅馬效力，事隔近八年再度合作，唔通韋達知道Cally甩拖，希望出一分力，想贏馬氹番Cally開心？