大年初一去睇賀歲波，上山段路過咗南華會停車場後，孔聖堂中學對面馬路遠遠傳嚟一陣嘈吵聲，行近啲原來係光頭好勞氣咁對住幾個差大哥，即刻上前問咩事。光頭一見到我即話：「領隊你嚟評吓理，記者入場門口就喺對面，班大哥係都唔畀我喺呢度過，一定要我去東院嗰邊過完行返嚟，你話係唔係玩嘢！」大球場改建後，就咁樣行入球場，𠵱家突然話唔行得，不過嘈咗幾句對方都係企硬，只好拉住光頭行去東院嗰邊過。冇計，今時今日差大哥確實大晒！
為咗等佢下番啖氣，即刻同佢講波，轉移吓視線。我話：「周六場巴黎聖日耳門（PSG）對圖盧茲，吼佢角球『大』有2.02倍，值得試試。PSG周中歐聯打和車路士，整體表現唔錯，可惜前線始終爭啲，射手卡雲尼（左）有多次刁鑽射門，如果唔係車仔門將泰拔高圖爾斯夠神勇已經入咗幾球。PSG主要靠兩閘叠瓦，對住近況差勁嘅圖盧茲，一定對準卡雲尼不停出波，角球多正路。」
另一場，就叫佢留意熱刺對韋斯咸，主勝有1.68倍，過年搵食要穩陣，北倫敦嘅熱刺最近出咗隻當紅炸子雞哈利卡尼，近三場入五球，頭頂腳踢乜都得，守波都有佢份，有佢熱刺球迷可以放心，對住心口贊助商換完又換嘅韋斯咸，掂啦！光頭仔聽完轉頭走人，我話咩事咁唔畀面呀！佢笑笑口話：「領隊，唔好誤會，怕唔記得，行去買咗先入場。」
本地職業領隊
耳聽八方 專收好料