英國樂隊Blur嘅粉絲有福了，佢哋前日趁大年初一喺倫敦一間茶樓開記招，宣佈會喺四月二十七號，相隔十二年再出大碟《The Magic Whip》。呢隻大碟最特別就係樂隊喺香港創作嘅，原來佢哋前年本來要去日本開騷，點知取消咗，之後佢哋就嚟咗香港五日，好即興咁租咗間錄音室打發時間。主音Damon Albarn話當時冇足夠嘅設備，感覺就好似初初出道錄音咁。
Blur喺Twitter放埋大碟封面，特別用繁體中文字將Blur譯成模糊，The Magic Whip就譯做魔鞭，成個感覺玩味十足。Blur又打鐵趁熱推出埋新歌《Go Out》歌詞MV，好無厘頭咁搵人教整雪糕，好多網友都話上YouTube睇一開頭以為個MV係廣告。
撰文：太空漿