這個年代要當藝人並不容易，有樣、有身材、能歌善舞、有演技變成基本入行條件。踏入二○一五年，伍家謙由體育版跳到娛樂版，以上要求有多少項達標仍未正式統計，但由簡單的棟篤企望鏡讀稿，變成chok樣加彎腰，還要側頭再加「射喱眼」才能滿足攝影師要求，他明顯有點吃不消：「係有啲唔慣，但樣樣都試吓，都幾得意，不過老婆睇到啲相就笑到肚痛。」
伍家謙身高六呎二，俊朗外表加上足球、籃球皆精，是電影橋段內女學生例必傾慕的學生情人，問伍家謙可曾想過用另外一個身份站在公仔箱內？他毫不猶豫：「完全冇喎！但試吓就唔會抗拒，辭職就係想乜都試吓當吸收經驗，但由細到大都冇諗過要做明星。」