昨日大年初二，亦係車公誕，新界鄉議局主席劉皇發例牌會去到車公廟為本港運程求籤，今年就求到第二十號中籤，籤文曰:「晨粧露彩髻邊雲，玉佩珠顏錦似銀；色則是空空是色，觀音曾勸世間人。」
昨日同場仲有行政會議成員兼立法會議員葉劉淑儀，不過眾人一入廟時就發生「意外」，葉劉身旁一隻麒麟突然撞向佢，令佢差不多跌低，佢身旁嘅人立即扶佢一把，而撞到佢嘅麒麟就後退消失於人群中。
不過網民睇過呢段片段之後，幾乎都冇咩人同情葉劉，反而仲恥笑佢，而一向敢言愛抽水嘅鄭中基就喺fb突然介紹麒麟話:「麒麟是中國古代神話傳說中的神獸，常與龍馬混淆。公獸為麒，母獸為麟，據說能活兩千年。性情溫和，身上雖有可攻擊敵人的武器，但不傷人畜，不踐踏昆蟲花草，故稱為仁獸。我愛麒麟。」
《100毛》創辦人林日曦亦喺fb話:「支持麒麟嚴正執法。麒麟清場，有足夠法律依據，亦有大量民意支持。葉太佔領通道係香港市民不可容忍嘅非法行為，麒麟只係使用最低武力驅趕葉太。撐麟大聯盟支持香港皇家麒麟，呢段日子，辛苦晒喇麒麟怪。」真係抽到水塘都乾埋。
而王宗堯就直頭喺fb話:「可喜可賀 恭喜恭喜!」....