蔡少芬和老公張晉上月踏入結婚七周年紀念，一家四口幸福滿瀉，大前日年廿九，蔡少芬帶兩個女兒與老爺奶奶提早團年，當日下午三時許，本報發現戴口罩的張晉在銅鑼灣出現，他步行到耀華街一間餐廳會合妻女及其他親友，其間張晉與爸爸走出餐廳外抽煙，兩父子邊吞雲吐霧邊傾偈，半小時後一行人齊齊離去。
當日由蔡少芬做司機接載所有人，上車前張晉先安頓兩女，將細女安排坐最後排由他看管，大女則坐中排由張媽媽陪伴，而張爸爸就坐在車頭蔡少芬旁邊。上車前，蔡少芬見到記者拍照時笑說：「唔好影我啲屋企人啦，佢哋怕醜呀！」
囡囡失望反面
此外，吳君如和陳可辛昨日帶囡囡陳是知離港度歲，君如現身機場時說：「今次去美國探親，一定要同個女去呀，唔去佢就會反面，噚晚我整蠱佢話不如唔好去，留港消費，佢就即刻反面樣囉。」君如表示在美國逗留約一星期，記者祝她的新戲《12金鴨》大賣，君如開心說：「多謝，返嚟派利是畀你哋呀。」
採訪、攝影：梁繼光、藍文浩、仇志德
