新正頭小妹先同大家拜年，祝大家羊年行好運、身體健康、波馬亨通！
身為利迷，我當然希望利物浦（圖）在羊年可以捧盃，全隊上下眾志成城給隊長謝拉特一個美好回憶。而事實上自從隊長宣佈季尾離隊後，成班波即一鼓作氣狂衝，近九場聯賽保持不敗之餘更贏足六場，可見球隊現時狀態士氣大勇。
今個星期利物浦將會作客修咸頓，雖然周中紅軍踢完場歐霸，好多球迷都會擔心球員體力問題，不過主隊近況亦有回落，我信紅軍可以在聯賽榜乘勝追擊！利物浦季初一度被批評攻力欠佳，然而近期總算有改善，被雪藏了一陣子的巴洛迪利，終於在前仗取得加盟後的首個入球，直接替紅軍全取三分。而剛戰英足盃的史杜列治亦為球隊射入扳平一球，賽後羅渣士更大讚此子速度高埋門觸覺好，傷癒後正逐步回復比賽狀態。加上史達寧有望在今場復出，紅軍現時進攻火力值得信賴。
主隊修咸頓近四次主場兩和兩負，主要原因是近期球隊飽受傷兵困擾，今仗前線沙恩朗、中場舒尼達連、後防艾達韋列特繼續上陣成疑，加上左閘賴恩貝特蘭停賽，陣容不整下相信難以跟氣勢如虹的利物浦抗衡。今場被譽為前四爭分戰，這三分紅軍志在必得！
KIT
波馬雙線主持