過去兩年，亞視藝高人膽大，在回帶台重播二十四年前的煙花匯演！宇宙已經無法阻止它的反智行為，不過如果只看一眼，閣下真能辨別每年的煙花樣式嗎？如果煙花只為維穩、營造歌舞昇平的假象，我們還有看的理由嗎？又如果，今晚一定要放煙花，但願我們有亞視死撐下去的勇氣，燃放這些由插畫師創作的另類煙花，市民必定奉陪到底，上街大叫「嘩嘩嘩」。民怨沖天，政府視若無睹，插畫師只好藉作品讓大家舒一口悶氣，送走去年不快。原來眾人不約而同希望齊昕父親爆爆爆，趁惡搞未變罪名，就讓我們天馬行空幻想煙花盛況。
記者：葉青霞
送狼送到西
「與其放煙花，不如直接射梁特上西天，個紅色火箭會綁到實，佢走唔甩，實在普天同慶，勞煩小鳳姐高唱：『熱烈地彈琴……』如此有意義嘅事，唔知CCTVB敢不敢直播？此情此境如果成真，到時全世界都會報道，佢就會同上斷頭台嘅法國國王路易十六齊名！放煙花筆錢用嚟成立藝術基金，教育下一代認識香港大自然，仲富意義。」
星比煙花好看
「我鍾意煙花，但唔鍾意嗰種粉飾太平嘅煙花，新年放就夠。香港嘅天空已經夠繁忙，頻密嘅航班、幻彩詠香江等等，大時大節不如畀佢好好休息。星星本來就係最勁嘅煙花，點綴漆黑夜空。我希望今日放嘅係『空氣炮』，即是放空氣，然後全城熄燈，畀大家睇吓星星，用放煙花嘅錢嚟起一個畀小孩玩嘅小型煙花公園，仲有意思啦！」
爆菊689
「如果一定要燒銀紙放煙花，咁當然要放啲振奮人心嘅款式。唔使放幾萬枚咁浪費，只放689枚就夠，而且煙花一定要係菊花形。雖然大部份香港人都唔會去維港兩岸睇，都未必會喺屋企睇直播，但第日嘅報紙刊登『爆你689菊花』標題，實在皆大歡喜。最希望梁特首親眼目睹爆菊花一幕，因為佢係主角囉！」
後雨傘花火
「畫中天上嘅小黃花火，寓意爭取真普選嘅力量遍地開花。畫作背景係我長大嘅觀塘，小時候嘅家已經拆咗，好希望可以喺老家同家人一齊睇煙花。搬到秀茂坪之後，從後樓梯嘅窗可以睇到一啲啲煙花，但幾年後就俾前面嘅高樓遮擋咗。香港發展得太快，舊區嘅人情、文化價值都唔受重視，一式一樣嘅社區毫無靈魂。睇到喜帖街極假嘅歐陸新貌；聽到觀塘要起音樂噴泉，實在無奈。」
願望沖天
「煙花爆爆爆，實在好難睇得出有乜特別字句。大時大節，不如以煙花訴心聲！第一幕『萬眾同心D7689』。數字讀出嚟好順口，冇乜特別意思，我強調真係冇特別意思，你聯想到其他嘢，我都唔會道歉，我估市民見到呢幕會好順氣。第二幕『野生發哥』，並以《獅子山下》做背景音樂勉勵港人。既然人人都想捕獲野生發哥，不如就放一個『發哥煙花』，到時全民合照，輕鬆捕獲。最後一幕『亞視精神』，點解冇嘢睇？有嘢睇㗎咩？咁呢一幕存在嚟做乜，係囉，點解仲存在呢？背景音樂會喪loop張家輝金句：『仆你個街，亞視嚟嘅喂。』如果真係咁放，我年廿八就去霸位。」
菊常開
「放煙花嘥錢又污染環境，應該全面停放，用嗰啲錢推動本土藝術仲好。689個腦大概生喺pat pat，如果一定要放煙花，就喺佢個『腦』度放，祝佢菊花常開兼闔家富貴，相信能為大家帶嚟歡樂。」
捍衞母語正體
「作品希望藉住煙花向外界宣示我哋捍衞繁體字同廣東話嘅立場。幾個月前發現用繁體字喺Google搵嘢，出現嘅結果大部份都係簡體字，唔通外國勢力都削弱我哋嘅語文意識？呢一幕煙花希望教育決策者可以睇到，等下一代可以繼續講母語寫正體。煙花年年大同小異，其實除咗喺維港放，也可考慮喺象徵香港精神的獅子山放呀！」
大會話今年煙花匯演會出現「羊」、「和」、「春」的字樣，真係好犀利呀，啪啪啪啪……
八百萬好好使
今年賀歲煙花約需花費八百萬，雖則有贊助商，但廿幾分鐘的璀璨，以一叠叠的鈔票助燃，真的值得嗎？八百萬，識得使，其實好好使！熱切盼望齊昕拍八十部電影激到阿爸阿媽龍蝦咁跳。
