專欄作家畢明由廣告業跳入傳媒界，她對電影的知識相當廣博，不僅為香港電影金像獎擔任專業評審，近年亦多次貼中奧斯卡金像獎的得獎名單，料事如神還準過風水師傅。
每年的奧斯卡影帝、影后，未到最後一刻都難分勝負，畢明所以能獲封奧斯卡神算，主要是她掌握一眾評審選心水的角度，加上視乎美國人口味，繼而猜度出最接近賽果的心水選擇。
單是去年奧斯卡，畢明預測最佳電影、最佳導演、最佳男主角、最佳女主角、最佳男配角及最佳女配角共六項殊榮，估中五個命中率極高。
【影評人】
畢明
最佳電影：《我們都是這樣長大的》
最佳導演：艾力謝路伊拿力圖
最佳男主角：艾迪烈柏尼
最佳女主角：茱莉安摩亞
「最佳電影一定頒畀《我們》，以表揚片廠入面每個單位所作出貢獻，從concept到製作各個單位都顯出熱情，荷李活以前冇drama咁做過，係個里程碑；艾力謝路齣戲上畫就已經係instant classic，電影結合現實同超現實，位位角色有戲可演，又諷刺荷李活濫拍。男主角我會揀艾迪，因為佢演出有層次，將健全到患病面對嘅困難演得肌理分明。」
仰止
最佳電影：《美國狙擊手》
最佳導演：/
最佳男主角：艾迪烈柏尼
最佳女主角：茱莉安摩亞
「近年奧斯卡好似冇咗目標，每年最佳電影都以數量取勝，對我呢個老人當然係希望奇連伊士活嘅《美國狙擊手》奪獎，老而彌堅之作，男主角大概係艾迪烈柏尼，女主角都會係茱莉安摩亞，絕症嘛！」
善人
最佳電影：《飛鳥俠》
最佳導演：艾力謝路伊拿力圖
最佳男主角：米高基頓
最佳女主角：瑪莉安歌迪娜
「李察一套戲拍十二年，心機毋庸置疑，但奧斯卡最佳導演唔係頒畀拍得最耐一套，艾力謝路齣戲集電影與舞台劇於一身，扮一鏡過嘅拍法佈局精妙，好配合《飛鳥俠》真實同虛幻交替主題，贏面唔細。」
張居
最佳電影：《布達佩斯大酒店》
最佳導演：韋斯安德遜
最佳男主角：班尼狄甘巴貝治
最佳女主角：茱莉安摩亞
「《布達佩斯》由劇本、演出至美術設計都可以話貼近完美，套戲用一個虛構角度，側寫一段漫長嘅歷史，不失幽默。不過奧斯卡評審同藝術成就一向唔多老友，《布》如果贏埋運就sure win。」
己駿
最佳電影：《我們都是這樣長大的》
最佳導演：李察連利加
最佳男主角：米高基頓
最佳女主角：茱莉安摩亞
「荷李活成日話追求新意，《我們》用十幾年拍一套戲，真係誠意十足，況且呢齣戲仲反映咗美國家庭概況。艾迪烈柏尼演出唔係話唔好，但米高基頓喺套戲度入晒魔，但又做得好smooth，光芒四射。」
敬璜
最佳電影：《我們都是這樣長大的》
最佳導演：李察連利加
最佳男主角：艾迪烈柏尼
最佳女主角：露莎蒙碧姬
「《失蹤罪》上畫時引起唔少迴響，但只有女主角露莎蒙碧姬入圍。此女過往只屬二線頭，今次於片中演活女人嘅變幻莫測，教人不寒而慄，演技大躍進，最希望佢爆冷。」