【福星迎春】鄺美雲（Cally）同恒基樓神林達民分手後，回復單身過羊年都不愁寂寞，皆因有愛犬「囝囝」Cash、「孫仔」Euro同埋舊年九月出世嘅「曾孫」Bank，全部都係關於吸財好意頭嘅好名，實行四代同堂，繼續富貴逼人來。
忙做善事
Cally不嬲係女強人，失戀後更專心珠寶同拍賣行生意，唔得閒拍拖，新年亦忙做善事，佢話：「年三十晚去參加祈福會，由凌晨十二點去到年初一，年初二去老人院探訪，過年好開心，好熱鬧。雖然都會見平時見嘅人，但係新年特別喜慶。之前都諗住新年出門，但係好攰，趁過年休息吓，見多啲親友，請佢哋嚟我屋企，當然係爭取多啲時間輕鬆吓。」
同樣係單身嘅廖碧兒（Bernice）亦會同佢七隻狗狗過年，之前就帶咗「孫女」Latte去扮靚靚：「佢係我哋屋企嘅公主，雖然已經做咗阿媽，不過佢身形最細粒同好嗲，除咗佢大爸爸，個個都就晒佢。」Bernice仲話新年會幫佢對狗爸媽派利是，仲會幫佢哋做賀年衫：「媽咪車嘢好叻，佢哋啲衫係佢造，不過新年係特別日子，都會買靚衫畀佢哋。」
撰文：馮仁昭
