啱啱踏入大年初一，皇家馬德里同佢哋嘅首席射手基斯坦奴朗拿度（C朗），已經向各大球迷派利是。周四凌晨上演嘅歐聯十六強首回合，着住桃紅戰衣、成個利是封咁嘅C朗終於翻生，交出一個入球一個助攻，助皇馬作客以2:0擊敗史浩克04，獲歐聯十連勝，仲成為今屆首周十六強唯一一支開出[-1]又贏到盤嘅球隊。
相信唔少球迷同我求大俠一樣，周三晚同屋企人開開心心食團年飯，跟住行吓花市，三點九坐定定睇歐聯好波；以香港時間計，已經踏入大年初一，皇馬就搵史浩克開年。客軍有葡萄牙中堅比比復出鎮守中路，後防穩陣好多，C朗亦擺脫五場冇波入嘅低潮（當中兩場停場），二十六分鐘接應右後衞丹尼爾卡華積傳中，成個飛將軍咁頂入，幫皇馬先開紀錄，個人仲累積七十六個歐洲賽入球，又追平番死敵美斯同前皇馬七號仔魯爾嘅紀錄。
首周唯一球隊開上盤
上屆十六強兩回合輸畀皇馬2:9出局嘅史浩克，今仗都唔算捱打，七十六分鐘日本國腳內田篤人美妙回傳，後備上陣嘅柏列迪勁射中楣彈出，而內田又執唔到雞。皇馬大難不死，整定開得出上盤，三分鐘後C朗橫傳，左閘馬些路用「私家Q」右腳都射入世界波，奠定2:0勝局；頭四場歐聯十六強終於開出上盤（見附表），叫做封大利是畀班上盤客啦。
雖然比較上屆首回合6:1數史浩克，皇馬今場叫贏少咗，不過次回合有主場之利，基本上佢哋已經大半隻腳入咗八強；球隊亦喺歐聯連贏十場，追平拜仁慕尼黑嘅紀錄。教練安察洛堤賽後好滿意咁講：「呢場波終於顯示到應有嘅比賽態度同表現，希望球員可以繼續。」
史浩克簡體字橫額拜年
呢排正值農曆新年，其實歐洲各球會都好重視中國呢個大市場，好似皇馬賽前就拍段賀年片，C朗、加里夫巴利同占士洛迪古斯等都用普通話拜年，又用毛筆寫吓揮春。至於史浩克今仗喺主場都掛出一條簡體字橫額「恭祝所有中國球迷羊年大吉」，令大家捱夜睇波開心吓。
識睇，一定係睇足英台【英波Live】：
http://soccer.appledaily.com
http://bit.ly/engballlive